Toafeltennistoernooi KSV-Litac 2015

2015 melkbus

Afgelopen donderdag was ’t wear zo wiet, de mansleu en vrouwleu van KSV war’n wear op’etrommeld um met de sporttasse achter op de fietse, en de pingpongplanken neet te vergett’n, de Zandschoppe op te zuuk’n van Litac Lechtenvoorde.

Veurig joar hebben Annie en heur gevolg de grote beker met de kleine oarne, bi’j ons better bekend as de melkbusse, in Lechtenvoorde kunn’n holl’n deur de leu uut Vroagender gin paar punten veursprong meer te geven. In ’t verleden kon dat wal. Das ok wal logisch want de leu van Litac stoat bi’jnoa elke dag te tikk’n in de Zandschoppe, terwijl de leu van KSV völle mear op de trekker zit en op de boerderi’je an ’t wark bunt en zo gin tied oaver hebt um te ping-pongen.

Moar umdat KSV veurig joar zo dikke an de konte hef e’had hef Annie zich toch maar oaver ’t hart e’strekken en de olde traditie wear op ‘epakt deur KSV vief punten veur te gev’n. Dat striek’n oaver ’t hart ging trouwens neet vanzelf want Annie had d’r wal een gipspeutjen an oaver e’holl’n (nog betterschap d’r met Annie).

Noa de warme ontvangst met koffie en ne plate cake (dee Tonnie zelf ‘e bakken had…. zegge zelf) ging ’t tikken los op vief toafels. De speune vloag ’n in de ronte en noa een paar uur massen en euzen was ’t bekekk’n. De punten werden op’eteld en doar was dan de uutslag.. KSV Vroagender 55 punten en Litac (moar) 35 punten. De grote beker kan (voorlopig) weer ne joar noar de Vroagenderbulte.

Um dizze kere Litac eets tegemood te komm’n hef KSV beslott’n (noa uutvoerig oaverleg en onder ’t genot van een telder arwtensoep) um volgend joar neet met vief punten veursprong te beginn’n moar met vier. Noatied bunne wi’j nog effen deur e’goane in de kantine en de laatsten hef de pap in de kelder e’zat en ’t lech uut ‘edoane.

Good goan en tut volgend joar.
Jos Bonekamp, spöller van KSV.

Hoofdsponsor

Subsponsoren

Alle sponsoren

mede mogelijk gemaakt door ltheme